Arlind Ajeti duhet të mendojë si të rifillojë gjithçka nga e para në verë, pasi nuk ka të ardhme te klubi i Grasshopers në Zvicër i cili e ka përjashtuar mbrojtësin shqiptar dhe do të ndërpresë shumë shpejt kontratën me të.

Skuadra e cila aktualisht mban vendin  funti në renditjen e kampionatit zviceran, ka nisur një projekt të ri me trajnerin Tomislav Stipiç, i cili ashtu si mbrojtësi kuqezi ka larguar edhe emra të tjerë të njohur.

Prej dy ditësh, ekipi është i grumbulluar pranë liqenit të Gardës për të përgatitur ndeshjet e pjesës së fundit të kampionatit. Por mes lojtarëve kishte mungesa të mëdha, mes të cilëve ishte edhe Ajeti.

Shumëkush e ka cilësuar si të tepruar këtë vendim dhe mendohej fillimisht se mos lojtarët në fjalë ishin dërguar te skuadra U21 për ndëshkim, siç ndodh rëndom në këto raste, “Jo, nuk ka kthim mbrapa”, deklaroi trajneri për të larguarit, duke bërë të qartë se karriera e tyre te Grasshopers ishte e mbyllur.

Përkrah Ajetit, mes emrave të larguar nga ekipi janë edhe dy shqiptarë të tjerë. I pari është Shani Tarashaj i cili ka qenë pjesë e Zvicrës në të kaluarën, si dhe Mërsim Asllani, pjesë e përfaqësueseve të moshave të Zvicrës./Insporti